دشمنی میں اندھے بھارت نے پاکستان کے خلاف فالس فلیگ آپریشن کی منصوبہ بندی کر لی ہے۔ تفصیلات کے مطابق بھارت کی جانب سے پاکستان کے خلاف فالس فلیگ آپریشن کی منصوبہ بندی کا انکشاف ہوا ہے۔ اس حوالے سے ذرائع نے بتایا کہ مقبوضہ کشمیر میں تین نوجوانوں کو جعلی مقابلے میں قتل کروایا جائے گا اور ضلع کشتواڑ کے علاقے میں پہلے سے اکٹھا کیا گیا اسلحہ ان نوجوانوں سے منسوب کیا جائے گا جس کے بعد بھارت کی جانب سے اس سب کا الزام پاکستان پر عائد کر کے من گھڑت جھوٹی کہانیاں بنائی جائیں گی۔
ذرائع نے کہا کہ غلام حسین، اقبال لون اور بشیر نامی افراد پہلے ہی بھارتی پولیس کی قید میں ہیں۔ خیال رہے کہ بھارت پاکستان دشمنی میں اس قدر اندھا ہو چکا ہے کہ وہ کبھی بھی کچھ بھی کر کے الزام بآسانی پاکستان پر عائد کر سکتا ہے اور عالمی سطح پر پاکستان کو بدنام کرنے کے لیے اپنی سازشوں کو عملی جامہ پہنا سکتا ہے۔
اس سے قبل بھی ایک ایسی ہی خبر موصول ہوئی تھی جس میں بتایا گیا تھا کہ ہندوستان ایک بار پھر خطے میں امن تباہ کرنے کے لیے سرگرم ہوگیا ہے اور اپنے اس مقصد کو پورا کے لیے بھارت ایک اور فالس فلیگ آپریشن کی تیاریوں میں مصروف ہے جس کے تحت ہندوستان پلوامہ طرز پر ایل او سی ، ورکنگ باونڈری پر کسی بھی قسم کے ایکشن کی تیاریوں میں مصروف ہے۔
بتایا گیا تھا کہ بھارت کی طرف سے ملک میں جاری کسانوں کے احتجاج اور کشمیر میں کیے جانے والے مظالم سے توجہ ہٹانے کے لیے فالس فلیگ آپریشن کی تیاریاں کی جارہی ہیں جس کی ایک وجہ لداخ اور دوکلم کے واقعات کے بعد ہونے والی ہزیمت کی وجہ سے بھارت پر پڑنے والا اندرونی اور بیرونی دباؤ بھی ہے۔ ان تمام رپورٹس کے پیش نظر پاک فوج کو ہائی الرٹ کر دیا گیا ہے تاکہ وہ بھارت کی جانب سے کیے جانے والے کسی بھی قسم کے ایڈونچر کا بروقت اور منہ توڑ جواب دے سکیں۔
Comments
Post a Comment